‘Iż-Żgħażagħ huma lkoll strumentali biex flimkien joħolqu differenza pożittiva fis-soċjetà li qed ngħixu fiha. L-inklużjoni ta’ kull persuna u l-impenn ta’ kullħadd biex ħadd ma jibqa lura huwa xhieda ta’ Azzjoni li permezz tagħha llkoll kemm aħna jkollna aktar faċilitajiet biex nirnexxu fil-ħajja ta’ kuljum’. Dan kien il-messaġġ li ż-żgħażagħ taż-ŻAK Mosta u tal-grupp Finlandiz Veto ħarġu waqt attività organizzata bħala parti mill-iskambju li qed isir din is-sena f’pajjiżna. Dan l-iskambju li hu ffinanzjat mill-Youth in Action Programme tal-Finlandja għandu t-tema ta’ Inklużjoni Artistika. L-iskop ta’ dan il-proġett hu li joffri liż-żgħażagħ parteċipanti u lill persuni b’diżabilità l-opportunità biex filwaqt li jipparteċipaw flimkien f’attivitajiet differenti jkollhom iċ-ċans li jitgħallmu mingħand xulxin f’ambjent informali.

Waqt attività organizzata f’Dar il-Kaptan fl-Imtarfa ż-żgħażagħ parteċipanti kellhom iċ-ċans li jieħdu sehem f’attivitajiet flimkien ma persuni b’diżabilità filwaqt li kellhom iċ-ċans li jsiru jafu aktar lill-xulxin filwaqt li jiddiskutu dwar temi ta’ interess differenti. Matul din l-attività ż-żgħażagħ parteċipanti tal-Proġett Inklużjoni Artistika u l-persuni b’diżabilità li jagħmlu użu mis-servizzi ta’ Dar il-Kaptan ħadu sehem f’attività artistika li permezz tagħha ħolqu tpinġijiet li ġew magħmula minn diversi frott u ħxejjex. Permezz ta’ din l-arti il-parteċipanti kollha wasslu messaġġ li bl-impenn u bir-rieda ta’ kullħadd nistgħu nagħmlu passi l-quddiem fejn aktar persuni jkunu aċċettati u integrati fis-soċjetà tagħna.

F’din l-attività ħa seħem ukoll is-Segretarju Parlamentari Clyde Puli fejn wassal messaġġ dwar l-importanza ta’ l-involviment taż-żgħażagħ f’inizzjattivi simili lhiema inizjattivi għandhom il-potenzjal li jagħtu opportunitajiet uniċi li permezz tagħhom dawk kollha nvoluti jibbenefikaw minn żvillup ħolistiku li jwassal biex ikun hawn sinerġija favur l-inklużjoni soċjali. Is-Segretarju Parlamentari faħħar l-impenn taż-ŻAK  Mosta u tal-group Veto għad-determinazzjoni u l-impenn tagħhom biex joħolqu dejjem aktar opportunitajiet ta’ formazzjoni maż-żgħażagħ li jiffrekwentawhom.

Matul l-attività Nicola Borg – leader miż-ŻAK Mosta u Heidi Saarinen Youth worker mill-grupp Veto saħqu li l-proċess għall-preparazzjoni ta’ dan l-iskambju involva diversi sfidi li għenu biex iż-żgħażagħ jaħdmu mill-qrib ta’ xulxin biex illum wasslu biex qed igawdu mill-frott ta’ ħidmiethom.

Il-Fondazzjoni Respite Care Services, hi bbażata f’Dar il-Kaptan l-iMtarfa u ġiet imwaqqfa f’ Novembru 1991. L-għan tal-fondazzjoni hu li tiprovdi servizzi professjonali kemm residenzjali kif ukoll matul il-ġurnata lill persuni b’diżabilità u l-familji tagħhom.

Il-Fondazzjoni hija organizzazjoni mhux governattiva u hija non profit. L-ispejjeż biex din id-dar tkun tista' topera huma koperti b’għotja mogħtija mill-gvern kull sena, ħlasijiet fuq servizzi mogħtija, kif ukoll minn donazzjonijiet u attivitajiet ta’ ġbir ta’ fondi li jsiru minn żmien għall ieħor.

Aktar informazzjoni dwar iż-ŻAK Mosta tista ssibha fuq il-website www.zakmosta.org.

Martin Chetcuti

ŻAK Mosta Youthworker – Mob 79856471

L-Azzjoni Kattolika Maltija (AKM) tilqa bi ħġarha lir-Ragħaj Spiritwali l-Papa Benedittu XVI f’pajjiżna. Din il-Miġja f’pajjiżna hija opportunità konkreta biex il-membri tal-Knisja Kattolika f’Malta jkollhom iċ-ċans biex jingħaqdu flimkien u jiċċelebraw l-imħabba ta’ Alla għalihom. Il-figura tal-Kap tal-Knisja Kattolika ġewwa pajjiżna għandha tixpruna l-entużjażmu u r-rieda biex ilkoll kemm aħna inwettqu ‘Azzjoni Kattolika’ konkreta matul il-ħajja tagħna ta’ kuljum.

Din l-opportunità għandha tkun strumentali biex ilkoll flimkien nersqu aktar lejn xulxin u mingħajr ebda preġudizmu ninfetħu biex naċċettaw lill-xulxin minkejja d-differenzi li jista' jkun hemm bejn xulxin. Kull persuna hija mezz importanti u riżorsa essenzjali li permezz tagħha s-soċjetà tista tagħmel avvanzi posittivi biex b’hekk aktar persuni jgħixu ħajja aħjar. L-importanti huwa li filwaqt li nirrikonoxxu lil kull persuna, nagħmlu dak kollhu possibli biex permezz ta’ l-istess rikonoxximent nagħtu l-possibilità lil kullħadd biex iħossu milqugħ u apprezzat.

Il-Miġja tal-Papa Benedittu XVI f’pajjiżna għandha sservi ta’ mezz biex filwaqt li napprezzaw il-ħidma tal-Knisja Universali fuq livelli differenti speċjalment ma’ persuni li jinsabu għaddejin minn żminijiet diffiċli, tkun ukoll mezz li permezz tagħha jsir invit miftuħ biex dawk kollha li jinsabu aljenati jew inkella il-bogħod mill-Knisja jindunaw li huma milqugħa li jerġgħu jingħaqdu fi ħdanha fuq għażla tagħhom. Dan kollhu għandu jwassal biex aktar persuni jħossuhom aktar viċin ta’ Alla permezz tal-involviment tagħhom fi ħdan il-Knisja Kattolika.

L-AKM tawgura li permezz ta’ din iż-żjara joħroġ ħafna ġid inkluż ġid spirtwali li jitkattar fost il-poplu kollhu. Permezz ta’ dan il-ġid imkattar j’Alla li aktar persuni jirrikonoxxu l-importanza u sħubija ta’ kull individwu biex b’hekk ikollna soċjetà miftuħa għat-tkattir tal-ġid komuni.

Martin Chetcuti

PRO Azzjoni Kattolika Maltija

Iż-Żgħażagħ Azzjoni Kattolika tixieq turi l-appoġġ tagħha lit-tmexxija tal-Knisja kemm f’Malta u kemm dik universali f’mumenti meta dawn iridu jieħdu deċiżjonijiet importanti dwar sitwazzjonijiet diffiċli li qed tiffaċċja l-Knisja bħalissa minħabba rapporti dwar abbużi minn naħa ta’ persuni li qed jaħdmu fi ħdanha. Fl-istess waqt iż-ŻAK tixtieq tħeġġeġ lill-awtoritajiet kemm ċivili u kemm ekkleżjastiċi biex jieħdu passi aktar iebsa biex jiġu evitati kull tip ta’ abbuż, speċjalment min-nies li għandhom r-rwol li jkunu ta’ appoġġ għal persuni oħra. 

Iż-ŻAK tesprimi d-dispjaċir tagħha għat-tfal u żgħażagħ li qed jgħaddu mit-trawmi ta’ abbużi.  Każijiet bħal dawn iħallu effetti negattivi fuq il-persuni għal tul ta’ żmien. F’dan id-dawl iż-ŻAK tisħaq fuq l-importanza ta’ Azzjoni Konkreta biex b’hekk dawn il-kazijiet ikunu kontrollati u possibilment eliminati. Iż-ŻAK tisħaq fuq l-importanza li jsir kull ma hu possibli biex persuni li huma vittmi ta’ dawn l-abbużi, jiġu megħjuna kif meħtieġ, filwaqt li l-persuni li jinsabu ħatja li abbużaw minn minorenni jinżammu ‘l bogħod minn ambjenti fejn jistgħu jerġgħu ikunu protagonisti ta’ xi abbuż fuq tfal jew żgħażagħ.  Iż-ŻAK tħoss il-bżonn tat-tisħiħ tal-edukazzjoni f’dan ir-rigward biex b’hekk kemm it-tfal u kemm iż-żgħażagħ ikunu aktar kapaċi jevitaw persuni  u sitwazzjonijiet li jistgħu ikunu ta’ ħsara għalihom, filwaqt li jkunu kapaċi ifittxu l-għajnuna neċċessarja f’każ li jispiċċaw vittma ta’ xi abbuż.

Iż-ŻAK qed turi d-diżaprovazzjoni tagħha għall-fatt li l-każijiet ta’ abbużi qed jintużaw biex tiġi attakkata l-kreddibilità tal-Knisja. Dan meta l-Knisja Kattolika stess hi attiva ħafna biex tappoġġja miljuni ta’ nies minn madwar id-dinja kollha permezz ta’ ħafna ħidmiet li l-maġġoranza tagħhom isiru fis-silenzju u mingħajr ebda tip ta’ promozzjoni. Permezz ta’ dan it-tip ta’ xogħol dawn il-persuni kienu u għadhom qegħdin jiġu mejjuna permezz ta’ diversi proġetti u inizjattivi li qegħdin isiru fuq livelli differenti.

Martin Chetcuti

PRO Azzjoni Kattolika Maltija